الحرية و الخلاص

حرية ؟ حرية .. مش عارفة ليه كل حاجة بتقيدني ، بتضايقني .. كل ماروح مكان أبقى عايزة أسيبه ، كل ما أصاحب ناس أبقى عايزة معرفهمش تاني ، ليه بحس إني بكره كل حاجة حواليا رغم إني في حقيقة الأمر بحب حاجات كتير

أو يمكن مش بحبها ، مش عارفة .. مجرد مابفقد اهتمامي ، خلاص ، يبقى الموضوع انتهى .. أي محاولة للاستكمال أو الاسترجاع تبؤ بالفشل الذريع ، قد تنجح محاولات التأجيل للانسحاب بس بمجرد مجيء فرصة للخروج تكون الفكرة المسيطرة و الحل الأمثل هو الخلاص من الحاجة اللي مضايقاني ..

عايزة أمشي ، عايزة أسيب و عارفة إني مهما سبت ، مهما مشيت و بعدت هيفضل لسه برضه بعيد .. بحاول أروح بعيد و أرجع للأصل ممكن يكونوا متناقضين و ممكن يكونوا حاجة واحدة ، مش عارفة بس أنا بحاول أعمل الاتنين يمكن واحدة فيهم تصيب .. كفاية كده النهارده