الأيام دى بقت كبيسة
و خبيثة ،
الـ24 ساعة أكتر من 24 بكتير
و الشمس بتتأخر أوى عقبال ما تطلع
كل يوم بتعافر و تقاوح
تتخانق مع الضلمة مع الخوف و الإرهاب
عشان تطل علينا ولو بشعاع
الشمس بتمشى بسرعة أوى
بتهرب و تخاف ،
لما تلاقى إنها مش قادرة تحمينا
كل اللى بتعمله إنها بتفضحنا
و تعرينا ،
و تخلى اللى ما يشترى يتفرج علينا !
الليل راجع تانى ،
الشمس بتغرب و الضلمة جاية ،
يمكن فى يوم ساعات الشمس
تبقى أطول من الليل
يمكن فى يوم الفجر يقهر الضلمة
يمكن فى يوم ، الشمس تطلع من غير خوف
نورها يبقى قوى و ثابت
و يبطل يتردد و يرتعش
يمكن فى يوم ،
الشمس تيجى و متمشيش ..
أمانة عليك يا ليل ، اخلــص !
* كتبت فى 30 يناير 2011
دي مش بس بتعرينا .. وتفضحنا .. وتجرسنا
ردحذفدي كمان بتخلينا عاملين زي اللي واقفين في غرفة تغيير ملابس كلها ازاز .. بحيث اللي جوه شايف اللي بره بس اللي برة مش شايفه
و كله خايف يقلع ........ وساعتها مش بيقلع الا البجح
او اللي عارف انه مش حيتشاف ....
بقيت بخاف من الليل .. والنهار كمان .. ياريت الدنيا تبقا فجر بس
ياريت تبقى فجر بس :) بتفائل بالفجر
ردحذف